ವಿಶ್ವಕಪ್ ಕ್ರಿಕೆಟ್| ಸಚಿನ್ ಸೇರಿ ದಿಗ್ಗಜರ ದಾಖಲೆ ಉಡೀಸ್ ಗೈದ ರಚೀನ್ ರವೀಂದ್ರ

ಕರ್ನಾಟಕ ಮೂಲಕ ನ್ಯೂಜಿಲ್ಯಾಂಡ್ ತಂಡದ ಯುವ ಆಟಗಾರ ರಚೀನ್ ರವೀಂದ್ರ ಪಾಕಿಸ್ತಾನ ವಿರುದ್ಧ ಶತಕ ಬಾರಿಸುವ ಮೂಲಕ ಕ್ರಿಕೆಟ್​ ದಿಗ್ಗಜ ಸಚಿನ್ ತೆಂಡೂಲ್ಕರ್ ಸೇರಿ ಹಲವರ ದಾಖಲೆಯನ್ನು ಮುರಿದಿದ್ದಾರೆ.
ಇದು ರಚೀನ್​ ಅವರ ಚೊಚ್ಚಲ ವಿಶ್ವಕಪ್​ ಟೂರ್ನಿ ಇಲ್ಲಿ ಮೂರು ಶತಕ ಬಾರಿಸಿದ ಸಾಧನೆ ಮಾಡಿದ್ದಾರೆ.ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಆರಂಭಿಕನಾಗಿ ಕಣಕ್ಕಿಳಿದ ರಚಿನ್​ ಪಾಕ್​ ಬೌಲರ್​ಗಳಿಗೆ ಸರಿಯಾಗಿ ದಂಡಿಸಿ ಮೆರೆದಾಡಿದರು. 94 ಎಸೆತಗಳನ್ನು ಎದುರಿಸಿ 15 ಬೌಂಡರಿ ಹಾಗೂ 1 ಸಿಕ್ಸರ್ ನೆರವಿನಿಂದ 108 ರನ್ ಕಲೆ ಹಾಕಿ ಶತಕ ಸಂಭ್ರಮಿಸಿದರು. ಇದೇ ವೇಳೆ ಹಲವು ದಾಖಲೆಯನ್ನು ಕೂಡ ಬರೆದರು.

ರಚಿನ್ ಶತಕ ಬಾರಿಸುವ ಮೂಲಕ ಟೀಮ್​ ಇಂಡಿಯಾದ ಮಾಜಿ ಆಟಗಾರ ಸಚಿನ್​ ತೆಂಡೂಲ್ಕರ್​ ಅವರ ವಿಶ್ವಕಪ್​ನ ದಾಖಲೆಯೊಂದನ್ನು ಮುರಿದರು. ಅತಿ ಕಿರಿಯ ವಯಸ್ಸಿನಲ್ಲಿ 3 ಶತಕ ಬಾರಿಸಿದ ಆಟಗಾರ ಎನಿಸಿಕೊಂಡರು. ಸಚಿನ್​ ಅವರು 1996 ವಿಶ್ವಕಪ್​ ಟೂರ್ನಿಯಲ್ಲಿ 2 ಶತಕ ಬಾರಿಸಿದ್ದರು. ಈ ದಾಖಲೆಯನ್ನು ರಚಿನ್​ ಅವರು ಕಳೆದ ಆಸೀಸ್​ ವಿರುದ್ಧದ ಪಂದ್ಯದಲ್ಲಿ ಶತಕ ಬಾರಿಸಿ ಸರುಗಟ್ಟಿದ್ದರು. ಇದೀಗ ಪಾಕ್​ ವಿರುದ್ಧ ಶತಕ ಬಾರಿಸಿ ಸಚಿನ್​ ಅವರನ್ನು ಹಿಂದಿಕ್ಕಿದ್ದಾರೆ. ಉಭಯ ಆಟಗಾರರು ಈ ದಾಖಲೆಯನ್ನು 23 ವರ್ಷದಲ್ಲಿ ಮಾಡಿದ್ದಾರೆ.

25 ವರ್ಷದ ಒಳಗೆ ವಿಶ್ವಕಪ್​ ಆವೃತ್ತಿಯಲ್ಲಿ ಅತಿ ಹೆಚ್ಚು ರನ್​ ಗಳಿಸಿದ ಸಚಿನ್​ ಅವರ ದಾಖಲೆಯನ್ನು ಕೂಡ ರಚಿನ್​ ಸರಿಗಟ್ಟಿದ್ದಾರೆ. ಸಚಿನ್​ ಅವರು 1996ರ ವಿಶ್ವಕಪ್​ ಟೂರ್ನಿಯಲ್ಲಿ 523 ರನ್​ ಬಾರಿಸಿದ್ದರು. ಸದ್ಯ ರಚಿನ್ ಕೂಡ 523* ರನ್​ ಬಾರಿಸಿದ್ದಾರೆ. ಮುಂದಿನ ಪಂದ್ಯದಲ್ಲಿ ಕೇವಲ ಒಂದು ರನ್​ ಗಳಿಸಿದರೂ ಸಚಿನ್​ ದಾಖಲೆ ಪತನಗೊಳ್ಳಲಿದೆ.

ಏಕದಿನ ವಿಶ್ವಕಪ್ ಇತಿಹಾಸದಲ್ಲಿ ನ್ಯೂಜಿಲ್ಯಾಂಡ್​ ಪರ ಮೂರು ಶತಕಗಳನ್ನು ಸಿಡಿಸಿದ ಮೊದಲ ಬ್ಯಾಟರ್ ಎಂಬ ದಾಖಲೆಯನ್ನು ರಚಿನ್​ ಬರೆದಿದ್ದಾರೆ. ಅಲ್ಲದೆ ವಿಶ್ವಕಪ್​ ಆವೃತ್ತಿಯೊಂದರಲ್ಲಿ 500 ರನ್ ಗಡಿ ದಾಟಿದ ನ್ಯೂಜಿಲ್ಯಾಂಡ್​ನ ಮೂರನೇ ಬ್ಯಾಟರ್ ಎನಿಸಿಕೊಂಡಿದ್ದಾರೆ. ಇದಕ್ಕೂ ಮುನ್ನ ಕೇನ್​ ವಿಲಿಯಮ್ಸನ್ (2019 ರಲ್ಲಿ 578) ಮತ್ತು ಮಾರ್ಟಿನ್ ಗಪ್ಟಿಲ್ (2015 ರಲ್ಲಿ 547 ) ರನ್​ ಬಾರಿಸಿದ್ದರು.

ಚೊಚ್ಚಲ ವಿಶ್ವಕಪ್​ ಆಡಿ ಅತ್ಯಧಿಕ ರನ್​ ಬಾರಿಸಿದ ಸಾಧಕರ ಪಟ್ಟಿಯಲ್ಲಿ ಪಾಕ್​ ನಾಯಕ ಬಾಬರ್ ಅಜಂ ಅವರನ್ನು ರಚಿನ್ ಹಿಂದಿಕ್ಕಿದ್ದಾರೆ. 523 ರನ್​ ಗಳಿಸಿ ಬಾಬರ್​ ಅವರ ದಾಖಲೆಯನ್ನು ಮುರಿದರು. ಬಾಬರ್​ 2019ರ ಆವೃತ್ತಿಯ ವಿಶ್ವಕಪ್​ನಲ್ಲಿ ಚೊಚ್ಚಲ ಬಾರಿ ಕಣಕ್ಕಿಳಿದು 474 ರನ್​ ಬಾರಿಸಿ ಇದುವರೆಗೆ 2ನೇ ಸ್ಥಾನದಲ್ಲಿದ್ದರು. ಈಗ ಮೂರಕ್ಕೆ ಜಾರಿದ್ದಾರೆ. ದಾಖಲೆ ಜಾನಿ ಬೇರ್​ಸ್ಟೋ​ ಹೆಸರಿನಲ್ಲಿದೆ. ಅವರು 2019ರ ಆವೃತ್ತಿಯಲ್ಲಿ 11 ಪಂದ್ಯ ಆಡಿ 532 ರನ್​ ಬಾರಿಸಿದ್ದರು. ರಚಿನ್​ ಅವರು ಮುಂದಿನ ಪಂದ್ಯದಲ್ಲಿ 10 ರನ್​ ಬಾರಿಸಿದರೆ ಬೇರ್​ಸ್ಟೋ​ ದಾಖಲೆ ಪತನಗೊಳ್ಳಲಿದೆ.